Deklarata e plotë:
Për ne kjo është krejtësisht e papranueshme, e dënueshme dhe si e tillë dëmtuese për atmosferën e përgjithshme të investimeve dhe të bërit biznes në Kosovë.
Fuqizimi nga institucionet e shtetit dhe përkrahja nga shoqëria është imperativ për krijimin e klimës së përshtatshme e shumë të nevojshme për të zhvilluar tutje sektorin privat, si punëdhënësi bindshëm më i madh në vend dhe kontribuesi kryesor i buxhetit të republikës.
Mbi të gjitha, vlerësojmë se mospërkrahja e bizneseve kosovare sot shkon në kundërshtim me politikat për rritjen e prodhimit vendor, si dhe zvogëlimin e importit dhe rritjen e eksportit.
Rikujtojmë se prodhuesi kosovar, me ngritjen e dukshme të cilësisë së prodhimeve, çdo ditë e më tepër po i zëvëndson prodhimet e importit, përfshirë edhe ato nga Serbia.
Debati i kotë i ditëve të fundit jo vetëm se i del në rrugë këtij momentumi, por pikërisht pengon zhvillimin e tij.
Shoqëria kosovare, e cila më në fund ka arritur të vendosë sistem të vlerave perëndimore në sistemin ekonomik dhe politik, duhet t’i gëzohet suksesit të ndërmarrësve, sepse me suksesin e zhvillimin e tyre padyshim rritet edhe suksesi dhe mirëqënia e shoqërisë.
Kërkojmë që demonizimi i ndërmarrësve të ndalet një herë e përgjithmonë dhe t’u njihet kontributi i patjetërsueshëm në shoqëri dhe shtet, si nevojë për emancipim shoqëror drejt zhvillimit të përgjithshëm në vend. /lajmi.net/